الرئيسية مواقف وأراء نصائح ذهبية لحب القراءة

نصائح ذهبية لحب القراءة

كتبه كتب في 9 فبراير 2019 - 01:22

من بين أجمل العادات اللي كتنفع الإنسان و يقدر يديرها سلاح فحياتو هي عادة القراءة. كلنا عارفين الأثر الكبير ديالها على المستوى الفكري و الثقافي و المعرفي ديال الإنسان، و بالرغم من ذلك قليل منا اللي كيجتهد باش يجعل من المطالعة عادة فالنهار ديالو .. ربما هاد العزوف عن القراءة و المطالعة راجع لكوننا حصرناهم في الدراسة و مقرراتها و تبرمجنا على هادشي من الصغر، و أكيد كاينة أسباب أخرى خاصة بكل واحد فينا اللي أغلبها بصراحة ما هو إلا أعذار كنبررو بيها هاد القطيعة مع الكتاب..

في نظري باش نحبو القراءة و تولي عندنا عادة لا يستغنى عنها كل يوم، خاصنا أولا نبداو بالمطالعة في مجال نهتم به، عندنا فيه شغف و يثير فضولنا باش تسهال علينا و دغيا نولفوها، و ماشي بالضرورة أبدا يكون في مجال التخصص الدراسي أو المهني.. الحاجة الثانية هي نحاولو نبنيو علاقة ألفة مع الكتاب، و حنا كنقراو نوجهو كل تركيزنا للكلمات اللي كتشوفها عينينا، نحاولو نعيشوها، نغوصو فيها و نحسو بيها.

الحاجة الثالثة هي نقراو في كتب ورقية، واخا الأنترنت اليوم كيوفر لينا كتب إلكترونية كثييرة و لكن من الأفضل نختارو النسخ الورقية حيث كتلعب دور كبيير في تقوية علاقتنا مع الكتاب و التعود عليه .. أخيرا، حنا ماشي مطالبين نخصصو ساعة أو أكثر في اليوم باش نتسماو “نقرأ و نطالع”، هادشي راه متعلق بالبرنامج اليومي ديال كل واحد فينا و إلا عطينا غير 15 دقيقة كل نهار لهاد النشاط راه فيها الخير و البركة و غتعطينا نتائج رائعة على المدى المتوسط و البعيد إلا قدرنا نداومو عليها.

مشاركة
تعليقات الزوار ( 160 )

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *